တောင်ပေါ် မြေပြန့်ပအိုဝ်းတိုင်းရင်းသားများ အားကိုးအားထားရသည့် အသောကာရာတိုက် မဟာဇေတဝန်ကျောင်း ဆရာတော် ငလျင်ကြောင့် ပျံလွန်တော်မူ

တောင်ပေါ် မြေပြန့်ပအိုဝ်းတိုင်းရင်းသားများ အားကိုးအားထားရသည့် အသောကာရာတိုက် မဟာဇေတဝန်ကျောင်း ဆရာတော် ငလျင်ကြောင့် ပျံလွန်တော်မူ
…………………………………..

ခမ်းသားငေါဝ်း
ဧပြီ ၂၊ ၂၀၂၅

https://www.facebook.com/share/p/1BtUKjy4cF/

တောင်ပေါ် မြေပြန့်ပအိုဝ်းတိုင်းရင်းသားများအပြင် ဘုရားဖူးဧည့်သည်များ အားကိုးအားထားရသည့် မန္တလေးမြို့ အသောကာရာတိုက် မဟာဇေတဝန်ကျောင်း ဆရာတော်ကြီး ဘဒ္ဒန္တပညာသီရိသည် မတ်လ ၂၈ ရက်တွင်ပြင်းထန်သည့် မြေငလျင်ကြောင့် ပျံလွန်တော်မူခဲ့ရကြောင်း သိရသည်။

မန္တလေးမြို့ အသောကာရာတိုက် မဟာဇေတဝန်ကျောင်း ဆရာတော်ကြီး ဘဒ္ဒန္တပညာသီရိသည် ပင်လောင်းမြို့နယ်ဇာတိ ပအိုဝ်းတိုင်းရင်းသားဖြစ်ကာ မိဘများက မန္တလေးတိုင်း ဆီမီးကန်ရွာသို့ ပြောင်းရွေ့ခဲ့ပြီး သာသနာဘောင်သို့ရောက်ရှိခဲ့ကြောင်း လက်ရှိပျံတော်မူသည့်အခါ သက်တော် ၇၂ နှစ် သိက္ခာတော် ၅၂ ဝါရှိကာ ဧပြီ ၃ ရက်တွင်ဆရာတော်အားရည်စူးကာ ကုသိုလ်ပြုလုပ်သွားမည်ဖြစ်ကြောင်း သိရသည်။

“ပထမအကြိမ် ငလျင်လုပ်တော့ ကျောင်းဟောင်းတခြမ်းပြိုသွားတယ် အာ့တာကိုဆရာတော်က ဦးဇင်းငယ်တစ်ပါးနဲ့အတူ သွားကြည့်တာ အာ့မှာဒုတိယအကြိမ်ငလျင်ထပ်လှုပ်တော့ အကုန်ပြိုကျပြီး ဆရာတော်ကော် ဦးဇင်းငယ်ကော်ပါသွားတယ်” ဟု ဆရာတော်၏ တပည့်သံဃာတစ်ပါးက ခမ်းသားကိုမိန့်ကြားခဲ့သည်။

ဆရာတော်သီတင်းသုံးနေသည့်ကျောင်းသည် မန္တလေးဘုရားကြီး(ခေါ်)မဟာမြတ်မုနိဘုရားနှင့်လည်းနီးသည့်အတွက် တောင်ပေါ်မြေပြန့်ရှိ ပအိုဝ်းတိုင်းရင်းသားများ ဆောင်းတွင်းတွင် လာရောက်တည်းခိုကြပြီး အမျိုးသမီးအိမ်သာ၊ ရေချိုးခန်း၊ အမျိုးသား အိမ်သာ၊ ရေချိုးခန်းစသည့်တို့အား စီစဉ်ပေးထားကြောင်း သိရသည်။

“ဘုရားဖူတွေမှမဟုတ်ဘူး ဘုရားထီးတင်ဖို့လာဝယ်တဲ့သူတွေ၊ ဘုရားပူဇော်ဖို့လာဝယ်တဲ့သူတွေ အိုးစည်၊ ဗုံမောင်းဝယ်မယ့်သူတွေ၊ ကုန်ကားသမားတွေကအစ အာ့မှာဘဲလာတည်းကြတယ် ဆရာတော်ကသဘောအရမ်းကောင်းတော့ ခုလိုဖြစ်တာစိတ်မကောင်းဘူး ဆရာတော်က ပင်လောင်းကလိမ္မော်သီးကြိုက်တယ် ပြီးတော့ ခေါင်းအုံးမုန့်၊ ပင်လောင်းလက်ဖက် တောင်ပေါ်ကလူတွေလာရင်သူပျော်တယ် ဇာတိကလူတွေနဲ့စကားပြောရလို့ ငယ်ငယ်ကတည်းဆီမီးကန်ကိုပြောင်းတော့ ပအိုဝ်းစကားပြောရင် မြေပြန့်ကပအိုဝ်းနဲ့ဆင်တယ်” ဟု ၎င်းကျောင်းတွင်ပညာသင်ကြားဖူးသည့် ဦးဇင်းတစ်ပါးက မိန့်ကြားသည်။

ဆရာတော် ဘဒ္ဒန္တပညာသီရိသည် ကျောင်းတွင် ပဌာန်းစာချပေးခြင်း၊ မန္တလေးသို့ပညာလာသင်သည့်ပအိုဝ်းတိုင်းရင်းသား သံဃာတော်များ အဆင်မပြေရှိသည့်အခါ ကူညီပေးခြင်း၊ သာသနာ့အကျိုးအပြင် တောင်ပေါ်မြေပြန့်ရှိ လူငယ်များ သင်တန်းတက်ခြင်း၊ အတန်းပညာတက်သည့်အခါတွင်လည်း ကျောင်းတွင်ကပ္ပိယအဖြစ်လက်ခံပေးခြင်းများ အပြင်တခြားသောလူမူအကျိုးပြုလုပ်ငန်းများစွာ လုပ်ဆောင်ခဲ့ကြောင်း သိရသည်။

PPV001
ပုံ- Cj
#သဘာဝဘေး
#တောင်ပေါ် မြေပြန့်ပအိုဝ်းတိုင်းရင်းသားများ
#ဘုရားဖူးဧည့်သည်များ
#အားကိုးအားထားရ
#မန္တလေးမြို့အသောကာရာတိုက်မဟာဇေတဝန်ကျောင်း
#ဆရာတော်ကြီးဘဒ္ဒန္တပညာသီရိ
#မြေငလျင်
#ပျံလွန်တော်မူ
“မြေပြင်သတင်းများကို ခမ်းသားငေါဝ်းကဆက် လက် ရေးသားဖော်ထုတ်လျက်ရှိပါတယ်။ပြည်သူလူထုတွေအနေနဲ့ မြေပြင်သတင်းတွေ ဓာတ်ပုံ ၊ ဗီဒီယိုတွေ ပေးပို့လိုပါက ခမ်းသားငေါဝ်း page မှာလည်းကောင်း၊ ခမ်းသားငေါဝ်း signal နဲ့telegram နံပတ်ဖြစ်တဲ့ +959774725839 ကိုလည်းကောင်း လွတ်လပ်လုံခြုံစွာ သတင်းပေးပို့နိုင်ပါတယ်ခင်ဗျား။
signal – https://signal.me/#eu/b1BdB1VJ0J4DDza-uD79yC3cP7VuRGLNKT9z8_N_mdcUbrnJioZDPaAJDrB21W7