ငလျင်သင့်ဒေသသို့ သတင်းမီဒီယာသမားများ မြေပြင်ကွင်းဆင်း၍ လွတ်လပ်၊ လုံခြုံစွာ သတင်း ရယူပိုင်ခွင့်ပေးရန် (IPCM) တောင်းဆို
…………………
ခမ်းသားငေါဝ်း
ဧပြီ ၁၊ ၂၀၂၅
https://www.facebook.com/share/p/1E5NTNqaQX/
ငလျင်ဒဏ်အခြေအနေကို အရေးပေါ်ကယ်ဆယ် ရေး ကာလမှ ပြန်လည်ထူထောင်ရေးကာလအထိ ရင်ဆိုင်ဖြေရှင်းရမည် ဖြစ်ပြီး ပြည်တွင်းပြည်ပမှ ကူညီကယ်ဆယ်ရေး ဝန်ထမ်းများသာမက သတင်းမီဒီယာသမားများ မြေပြင်ကွင်းဆင်း၍ လွတ်လပ်လုံခြုံစွာ သတင်းရယူပိုင်ခွင့်ပေးရန် အရေးကြီးကြောင်း ဧပြီလ(၁)ရက်နေ့မှာ (IPCM)ကတောင်းဆိုသည်။
မတ်လ(၂၈)ရက်မှာ လှုပ်ခတ်လိုက်သည့်ငလျင်ကြီးသည် မြန်မာနိုင်ငံ၏ ခေတ်သစ်သမိုင်းတွင် အပြင်းထန်ဆုံးဖြစ်ကြောင်း လွတ်လပ်သော မြန်မာသတင်းမီဒီယာကောင်စီ(IPCM)မှ ပြောဆို ထားသည်။
ငလျင်ကြောင့် စစ်ကိုင်း၊ မန္တလေး၊ တံတားဦး၊ မြစ်သား၊ ပျော်ဘွယ်၊ နေပြည်တော်၊ ပျဉ်းမနား၊ တောင်ငူ စသည့်ဒေသများတွင် အကြီးအကျယ်ထိခိုက် ပျက်စီးမှုများ ရှိခဲ့ပြီး လမ်း၊ တံတားနှင့် ဘာသာရေးနေရာအပါ အခြားအဆောက်အဦးများစွာပျက်စီးပြီး လူသေကြေ ထိခိုက်ကိန်းများမှာ နေ့စဉ်မြင့်တက်လာကြောင်း ဖော်ပြထားသည်။
ထိုအခြေအနေများမှာ မှန်ကန်သော သတင်းအချက်အလက်များကို ငလျင်ဒဏ်ခံ ပြည်သူများနှင့် ကူညီကယ်ဆယ်သူများက သိရှိရန် လိုအပ်ပြီး၊ အကူအညီများ လိုအပ်သူထံသို့ ရောက်မရောက် ပွင့်လင်းမြင်သာစွာ တာဝန်ခံမှုရှိမရှိ သတင်းမီဒီယာက ကူညီပံ့ပိုးနိုင်ကြောင်း ဖော်ပြထားသည်။
စစ်ကောင်စီသည် ကန့်သတ်ပိတ်ဆို့ထားသော အင်တာနက်ကို ပြန်ဖွင့်ပေးရမည်၊ ကပ်ဘေးကာလအတွင်း အင်တာနက် ဆက်လက်ပိတ်ဆို့ထားမှုသည် အကြပ်အတည်းကို ပိုမိုဆိုးရွားစေကြောင်း ဖော်ပြထားသည်။
ထို့ပြင် စစ်ကောင်စီမှနှစ်ပေါင်းများစွာ အင်တာနက်ဖြတ်တောက်မှုကို ပြုလုပ်နေပြီး အရေးပေါ်ကာလကြုံတွေ့ချိန်မှာလည်း အင်တာနက်ပြန်လည်ဖွင့်ပေးရန် လျစ်လျူရှု ငြင်းဆန်ကြောင်း နိုင်ငံတကာအကူအညီများထဲတွင် အမေရိကန်မှ Starlink ဆက်သွယ်ရေး စနစ်များလည်း ပါဝင်ရာ အများပြည်သူအကျိုးကို မျှော်ကိုးလျက် အလျင်အမြန် လက်ခံအသုံးပြုသင့်ကြောင်း ဖော်ပြထားသည်။
စစ်ကောင်စီသည် (၂၀၂၃)ခုနှစ်၌ ရခိုင်ပြည်နယ် မုန်ခါမုန်တိုင်း သဘာဝဘေးအန္တာရယ် မှတ်တမ်းယူနေစဉ် ဖမ်းဆီးပြီး Myanmar Now သတင်းဌာနမှ သတင်းထောက် ကိုစိုင်းဇော်သိုက်ကို ထောင်ဒဏ် နှစ်(၂၀) ချမှတ်ခဲ့ခြင်းရှိခဲ့ပြီး ကိုစိုင်းဇော်သိုက်နှင့် ဖမ်းဆီးခံ သတင်းမီဒီယာသမားများကို ခြွင်းချက်မရှိ အမြန်ဆုံးလွတ်ပေးရန် လွတ်လပ်သော သတင်းမီဒီယာကောင်စီမှ တောင်းဆိုထားသည်။
၎င်းအပြင် နိုင်ငံအတွင်း ငလျင်ဒဏ်ကြောင့် သက်ရောက်မှုများကို သတင်းရယူနိုင်ရေးအတွက် နိုင်ငံတကာသတင်းထောက်များကိုလည်း စစ်ကောင်စီက ဗီဇာ အလွယ်တကူထုတ်ပေးရန် (IPCM)က တောင်းဆိုထားသည်။
စစ်ကောင်စီပြောရေးဆိုခွင့်ရ ဗိုလ်ချုပ်ဇော်မင်းထွန်း၏ နိုင်ငံတကာ သတင်းထောက်များကို ပြည်တွင်းသို့ ပေးမဝင်လိုသည့်အပေါ် (IPCM)အနေဖြင့် ရှုတ်ချကန့်ကွက်ပြီး အများပြည်သူနှင့် နိုင်ငံတကာပြည်သူများ ကူညီပံ့ပိုးနိုင်သည့် အဖွဲ့အစည်းများ သိရှိရန် သတင်းရယူ တင်ဆက်ဖော်ပြခွင့် ရရှိရန် တိုက်တွန်းထားသည်။
#PPV0011
#သတင်းလွတ်လပ်ခွင့်
#သဘာဝဘေး
#IPCM
ခမ်းသားငေါဝ်း Telegram
https://t.me/thepeoplevoicePaO
ခမ်းသားငေါဝ်း Tittok www.tiktok.com/@khamsarngor1
ကိုလည်းဝင်ရောက်ဖတ်ရှုနိုင်ပါသည်။