ရန်ကုန်မြို့အပါအဝင် မြို့ကြီးတွေမှာ အင်အားပြင်းနောက်ဆက်တွဲငလျှင် ထပ်လာနိုင်ခြေရှိနေတယ်ဆိုတဲ့ သတင်းမှား
မတ်လ၊၃၀။
(Fact Check) DNA/ The Red Flag
ရန်ကုန်မြို့အပါအဝင် မြို့ကြီးတော်တော်များများမှာ ပြင်းအားကောင်းတဲ့ငလျှင်တခု ဒီကနေ့ညမှာ ထပ်မံလှုပ်လာနိုင်တယ်ဆိုပြီး အစိုးရကလိိုက်လံအသိပေးနှိုးဆော်မှုတွေရှိနေတယ်လို့ လူမှုကွန်ယက်ဆိုရှယ်မီဒီယာပေါ်မှာ ရေးသားမျှဝေမှု တွေမြင့်တက်နေပါတယ်။
ဒါပေမယ့် ပညာရှင်တွေကတော့ မနေ့က မတ်လ ၂၈ ရက်နေ့ မွန်းလွဲပိုင်းမှာ ရစ်ချ်တာ ၇.၇ အဆင့်ရှိတဲ့ ငလျှင်လှုပ်ခတ်ခဲ့ပြီးတဲ့နောက် နောက်ဆက်တွဲအနေနဲ့ ငလျှင်ငယ်လေးတွေသာ ထပ်မံလှုပ်လာနိုင်ပြီး ဒီထပ် ပြင်းအားကောင်းတဲ့ ငလျှင်မျိုးတွေတော့ ထပ်လှုပ်လာနိုင်မှာမဟုတ်ဘူးလို့ ဆိုကြပါတယ်။
အင်အားကြီးငလျှင်ထပ်မံလှုပ်ခတ်လာနိုင်တယ်ဆိုတဲ့ အကြောင်း ပျံ့နှံ့နေတဲ့သတင်းတွေနဲ့ပတ်သက်ပြီး MFCNအဖွဲ့ဝင်ဖြစ်တဲ့ DNA Fact Check အဖွဲ့ကနေစစ်ဆေးကြည့်တဲ့အခါမှာ ညဘက်အိပ်တဲ့အချိန် ငလျှင်ငယ်လေးတွေ လှုပ်နိုင်ခြေရှိနေတာကြောင့် သတိထားဖို့လိုက်လံနှိုးဆော်နေတာဖြစ်ပြီး ပြင်းအားမြင့်ငလျှင်လှုပ်နိုင်ခြေရှိတယ် ဆိုတာသတင်းမှားဖြစ်ကြောင်းအတည်ပြုနိုင်ခဲ့ပါတယ်။
စစ်ကိုင်းရေခါးအင်း၊ တံတားဦးလေဆိပ်မြို့ကနေ အောက်ဘက်နေပြည်တော်အထိ အနီရောင်အဆင့်အထိရောက်နေပြီတော့ အနီရောင်အဆင့်အထိရောက်နေတဲ့ မြို့နယ်တွေမှာ ငလျှင်အပြင်းစားလှုပ်နိုင်တယ်လို့ USGS တို့ DACS တို့လိုအဖွဲ့အစည်းတွေက ဖော်ပြနေတာမျိုးရှိနေပေမယ့် အတည်ပြုလို့ရနိုင်ခြေမရှိဘူး မိုးလေဝသပညာရှင် ဦးဝင်းနိုင်ကရှင်းပြပါတယ်။
“ငလျှင်ကကြိုပြီးခန့်မှန်းလို့မရဘူး၊ ဖြစ်နိုင်တယ်ဆိုတာလည်းမရှိဘူး၊ နောက်ဆက်တွဲငလျှင်တွေက ၃၊ ၄ အဲ့ဒီပတ်ဝန်းကျင်လောက်နဲ့သွားနေတယ်၊နောက်ဆက်တွဲက အားပျော့လာတဲ့အခြေနေမှာရှိတော့ အကြီးကြီးလှုပ်လာနိုင်ခြေမရှိဘူးလို့ ကျနော်တို့ယူဆပါတယ်”လို့ သူကဆိုပါတယ်။
ပြီးခဲ့တဲ့ မတ်လ၊ ၂၈က လှုပ်ခတ်ခဲ့တဲ့ငလျှင်ကြောင့် အများဆုံးထိခိုက်ခဲ့တဲ့မြို့တွေဖြစ်တဲ့ မန္တလေးတိုင်း၊ စစ်ကိုင်းတိုင်း၊ နေပြည်တော်၊ ပျဥ်းမနားစတဲ့မြို့တွေမှာရှိတဲ့ အဆောက်အဦးတွေအနေနဲ့ ၇.၇ရစ်ချတာစကေးရှိတဲ့ငလျှင်ဒဏ်ကို ထိခိုက်ခံစားခဲ့ရတာကြောင့် နောက်ဆက်တွဲငလျှင်တွေက ၄၊ ၅ စကေးလောက် ထပ်မံလှုပ်ခတ်ခဲ့ပါက ပြိုကျပျက်ဆီးနိုင်ခြေရှိတယ်လို့ ပညာရှင်တွေကအသိပေးနှိုးဆော်နေပါတယ်။
လက်ရှိ ၁၂:၄၅ နောက်ဆုံးရငလျှင်သတင်းအရ ရှမ်းပြည်နယ်၊ ကိုဩဒီနိတ် 20.3600, 96.6710ရဲ့ အနက် ၁၉.၀ ကီလိုမီတာအနက်ရှိမှာ ၃.၃ ပြင်းအားငလျှင်လှုပ်ခတ်ခဲ့တယ်လို့ MM Earthquake Alert (https://t.me/mm_earthquake_alert/78 )ကဖော်ပြပေးထားပါတယ်။
လက်ရှိမြေပြင်ငလျှင်လှုပ်ခတ်မှု ထုတ်ပြန်ချက်တွေနဲ့ နောက်ဆက်တွဲအခြေနေတွေကိုလည်း တလီဂရန်ချန်နယ် MM Earthquake Alert(https://t.me/mm_earthquake_alert )ကလည်းဖော်ပြပေးနေပါတယ်။
လက်ရှိမြေငလျှင်နဲ့ပတ်သက်ပြီး ချဲ့ကားပြောဆိုနေတဲ့သတင်းတွေရှိသလို သတင်းမှားတွေကိုစိုးရိမ်လွန်ကဲပြီး ထပ်ဆင့်ဖြန့်ဝေနေကြတာတွေရှိတာကြောင့် ဆိုရှယ်မီဒီယာပေါ်က သတင်းတွေကို အလွယ်တူမယုံကြဖို့ အသိပေးလိုပါတယ်။
စာဖတ်သူတွေအနေနဲ့ မြေငလျှင်နောက်ဆက်တွဲအခြေနေတွေကိုသိလိုတာဖြစ်ဖြစ်၊ သတင်းတု/သတင်းမှား ဖြစ်တယ်လို့ သံသယရှိရင်ပဲဖြစ်ဖြစ်၊ မှန်ကန်တဲ့သတင်း ဟုတ်၊ မဟုတ်အတည်ပြု မေးမြန်းလိုရင်ပဲဖြစ်ဖြစ်၊ Fact Checking ပြုလုပ်ပေးတဲ့ သတင်းဌာန/အဖွဲ့ အစည်းတွေရဲ့ Chat Box ကနေ သွားရောက်မေးမြန်းကြဖို့ တိုက်တွန်းလိုပါတယ်။
Myanmar Fact-checking Network အဖွဲ့ဝင်ဖြစ်တဲ့ DNA Fact Check အဖွဲ့ကိုလည်း Facebook page ကနေဆက်သွယ်မေးမြန်းနိုင်သလို ဒီနေရာ (dnafactcheck @gmail.com)ကနေ လည်း ဆက်သွယ်မေးမြန်းပြီး အချက်အလက်စစ်ဆေးပေးဖို့ တောင်းဆိုနိုင်ပါတယ်။
Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။
Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။
Web – https://myanmarfactcheckingnetwork.org/
Fb – https://www.facebook.com/myanmarfactcheckingnetwork