ဆောင်းပြောင်းတွင် တော်လှန်ရေးတပ်ဖွဲ့များဆုတ်သွားပြီးနောက် စစ်ကောင်စီနှင့် လက်အောက်ခံ ထိန်းချုပ်ထားစဥ် ဒေသခံနေအိမ်များအားမီးရှို့နေ

ခမ်းသားငေါဝ်း

မေ ၂၉၊ ၂၀၂၅

ဆောင်းပြောင်းကျေးရွာတွင် တော်လှန်ရေးတပ်ဖွဲ့များဆုတ်သွားပြီး စစ်ကောင်စီနှင့် PNOပြည်သူ့စစ်ထိန်းချုပ်ထားစဥ် ဒေသခံနေအိမ်များအား မီးရှို့ဖျက်စီးနေကြောင်း မေလ(၂၉)ရက်နေ့တွင် ဒေသခံထံမှသိရသည်။

ရှမ်းပြည်နယ်တောင်ပိုင်း၊ ပင်လောင်းမြို့နယ်၊ ဆောင်းပြောင်းကျေးရွာတွင် မေလ(၁၆)ရက်နေ့မှစကာ စစ်ကောင်စီ၊ လက်အောက်ခံ PNO ပြည်သူ့စစ်နှင့် တော်လှန်ရေးတပ်ပေါင်းစုတို့ကြား (၁၀)ရက်ကျော်ကြာ တိုက်ပွဲပြင်းထန်စွာဖြစ်ပွားခဲ့ပြီး ယခုချိန်တွင်စစ်ကောင်စီတပ်ဖွဲ့များက ပြန်လည်ထိန်းချုပ်နိုင်ပြီဖြစ်ကြောင်း သိရသည်။

တိုက်ပွဲအတွင်းဒေသခံနေအိမ်များထိခိုက်ပျက်စီးမှုများရှိခဲ့ပြီး တော်လှန်ရေးတပ်ဖွဲ့များနောက်ဆုတ်သွားသည့် နောက်ပိုင်းဆောင်းပြောင်းအနောက်ရွာဒေသခံနေအိမ်များကို စစ်ကောင်စီတပ်ဖွဲ့ဝင်များနှင့်လက်အောက်ခံ PNO ပြည်သူ့စစ်က ရည်ရွယ်ချက်ရှိရှိ မီးရှို့ဖျက်စီးခြင်းပြုလုပ်နေကြောင်းသိရသည်။

“အခုနေအိမ်တွေက တမင်တကာအရှို့ခံရတာ PNO တွေကလူငှါးပြီးတော့ တောင်ဘက်ကနေစပြီးရှို့တာ တော်လှန်ရေးသမားနောက်ဆုတ်သွားတာကလည်း (၃)ရက်လောက်ရှိနေပြီလေ၊ ဟိုရက်ကနေအိမ်ထပ်ရှို့မယ်ပြောသံကြားတာ မနေ့ကတကယ်ရှို့သွားတယ်၊ ကျွန်တော်အသိအိမ်ဆိုလည်း အဲ့မတိုင်ခင်အကောင်းတိုင်းရှိသေးတယ် မနေ့ညနေရောက်တော့ အိမ်ကမီးအရှို့ခံလိုက်ရပြီ”ဟု ဒေသခံတစ်ဦးက ခမ်းသားငေါဝ်းကိုပြောသည်။

စစ်ကောင်စီမှင့် PNO ပြည်သူ့စစ်ထိန်းချုပ်ပြီးနောက်ယမန်နေ့နံနက်ပိုင်းတွင် ဒေသခံပြည်သူအချို့ရွာထဲပြန်ဝင်ခွင့်ရပြီး အချို့နေအိမ်က မီးစလောင်ရုံအနေထားပဲရှိသေးပြီး အချို့နေအိမ်ကနံနက်ပိုင်း၌အကောင်းတိုင်းရှိ နေသေးသော်လည်း ညနေပိုင်းတွင်တစ်အိမ်လုံးမီးလောင်သွားပြီဖြစ်ကြောင်းသိရသည်။

“လောလောဆယ်တော့(၃၀)ကျော်ပြီမီးလောင်သွားတာ ရွာမှာရှိတဲ့ PNO အဖွဲ့ဝင်နေအိမ်ဆို မီးမလောင်ဘူး တစ်ခြားအိမ်တွေပဲလောင်သွားတာ အခုကဓာတ်ဆီတွေနဲ့တစ်အိမ်ပြီးတစ်အိမ်လိုက်ရှို့နေတာ မကုန်မချင်းလိုက်ရှို့နေတာထင် သူတို့ကဒီလိုလုပ်ပြီးအမှားတွေပြန်ပြောတော့မယ်သေချာတယ် အမှန်ကိုသူများမသိတာကျနေတာပဲ”ဟု ၎င်းကဆက်ပြောသည်။

နောက်ထပ်ဒေသခံတစ်ဦးက “ဆောင်းပြောင်းရွာမှာတိုက်ပွဲပြန်ဖြစ်ရင် ဆောင်းပြောင်းအနောက်ရွာ(ဒုံတွို့ꩻ)ကို မီးရှို့ပစ်မယ်ဆိုပြီး အရင်ကတည်းကသူတို့(PNO)ကပြောထားပြီးသား၊ ဘာလို့ဆိုအနောက်ရွာက PDFတပ်ထဲ ဝင်တဲ့လူလည်းရှိတော့လေ၊ အခုကတော်လှန်ရေးသမားတွေနောက်ဆုတ်ပြီးမီးရှို့သွားတယ်ပြောရအောင်လည်း တစ်ချို့အိမ်တွေဆိုအခုမှမီးစလောင်တာလေ၊ ပြီးတော့သူတို့လည်းရွာထဲကားနဲ့ဖြတ်မောင်းလို့ရနေပြီကို ဖြစ်နိုင်ချေကိုမရှိတာ”ဟု ပြောသည်။

စစ်ကောင်စီတပ်ဖွဲ့ဝင်များသည် တိုက်ပွဲဖြစ်ပွားသည့်ကျေးရွာများတွင် ၎င်းတို့ပြန်လည်သိမ်းပိုက်ရရှိပါက PDF တပ်ဖွဲ့များနေအိမ်မီးရှို့မည်ဟုပြောဆိုပြီး အရပ်သားပြည်သူနေအိမ်များကို မီးရှို့ဖျက်စီးခြင်း ပြုလုပ်လေ့ရှိကြောင်း ဒေသခံများပြောဆိုချက်အရသိရသည်။

PNO ပြည်သူ့စစ်လောဘီသတင်းဌာနနှင့် အဖွဲ့ဝင်များက တော်လှန်ရေးတပ်ဖွဲ့များကမီးရှို့ခြင်းဖြစ်ကြောင်း စွပ်စွဲထားသော်လည်း ဒေသခံများက တော်လှန်ရေးတပ်ဖွဲ့များဆုတ်ခွါပြီး ရွာအတွင်းစစ်ကောင်စီနှင့် PNO ပြည်သူ့စစ်များထိန်းချုပ်ပြီးနေရာယူစဥ် မီးရှို့ခံရခြင်းဖြစ်ကြောင်း ဟိုပုံးကိုရင်လေးနှင့်ခွန်တန်ဇာတ်လိုက်တို့အားယုံကြည်သည့်အိမ်များ မြိုင်ကလေးဆရာတော်အားယုံကြည်သည့် သားသတ်လွတ်စားသည့်အိမ်များမီးရှို့ခံရပြီး PNO အားပေးသည့်အိမ်များကကျန်ခဲ့ကြောင်း သိရသည်၊၊

ဆောင်းပြောင်းရွာကို မေလ(၂၇)ရက်နေ့၌ စစ်ကောင်စီနှင့် PNO ပြည်သူ့စစ်တပ်များ ပြန်လည်ထိန်းချုပ်နိုင်ပြီဖြစ်ကြောင်း PNA လူမှုကွန်ယှက်စာမျတ်နှာပေစ့်ရဲ့ဖော်ပြချက်အရသိရသည်။

#PPV007
#Video : onlin
#လူ့အခွင့်အရေး
#ပင်လောင်းမြို့နယ်
#ဆောင်းပြောင်းကျေးရွာ
#စစ်ကောင်စီလက်အောက်ခံ
#PNO
#ပြည်သူ့စစ်
#တော်လှန်ရေးတပ်ပေါင်းစု
“မြေပြင်သတင်းများကို ခမ်းသားငေါဝ်းကဆက် လက် ရေးသားဖော်ထုတ်လျက်ရှိပါတယ်။ပြည်သူလူထုတွေအနေနဲ့ မြေပြင်သတင်းတွေ ဓာတ်ပုံ ၊ ဗီဒီယိုတွေ ပေးပို့လိုပါက ခမ်းသားငေါဝ်း page မှာလည်းကောင်း၊ ခမ်းသားငေါဝ်း signal နဲ့telegram နံပတ်ဖြစ်တဲ့ +959774725839 ကိုလည်းကောင်း လွတ်လပ်လုံခြုံစွာ သတင်းပေးပို့နိုင်ပါတယ်ခင်ဗျား။
signal – https://signal.me/#eu/b1BdB1VJ0J4DDza-uD79yC3cP7VuRGLNKT9z8_N_mdcUbrnJioZDPaAJDrB21W7