အပစ်ရပ်ကာလ စစ်ကောင်စီလေကြောင်း တိုက်ခိုက်မှုကြောင့် လွိုင်ကော်မြို့နယ် အရပ်သား(၅)ဦးသေဆုံး
………………
ခမ်းသားငေါဝ်း
ဧပြီ ၅၊ ၂၀၂၅
https://www.facebook.com/share/p/1EP9ybkgHD/
ရှမ်း-ကရင်နီနယ်စပ် မိုးဗြဲနှင့် လွိုင်ကော်ကြားရှိ ပီကင်းကောခူကျေးရွာသို့ တိုက်ပွဲဖြစ်ပွားခြင်း မရှိဘဲ စစ်ကောင်စီမှ လက်နက်ကြီး၊ လေကြောင်းဖြင့် တိုက်ခိုက်ခြင်းကြောင့် အရပ်သားပြည်သူ(၅)ဦး ထိခိုက်သေဆုံးခဲ့ရကြောင်း ဧပြီလ(၅)ရက်နေ့မှာ (KNDF)က ထုတ်ပြန်သည်။
ဧပြီလ(၄)ရက် နေ့တွင် လွိုင်ကော်၊ ပီကင်းကောခူ ကျေးရွာသို့ မိုးဗြဲမြို့အခြေစိုက် ခမရ(၄၂၂) တပ်ဖက်မှ မြို့တွင်းနှင့် အနီးဝန်းကျင်ကျေးရွာ၌ တနေကုန်နီးပါး လက်နက်ကြီး ပစ်ခတ်၍ မနက်(၁၁)နာရီခွဲအချိန်မှာ ဒေသခံ အရပ်သား အမျိုးသား(၁)ဦး ထိမှန်သေဆုံးခဲ့ကြောင်း ထုတ်ပြန်ချက်အရ သိရသည်။
“တိုက်လေယာဉ်က တနေကုန်လုံးဝဲနေတာ။ အပစ်ရပ်ထုတ်ပြန်ချက်က ဘယ်မှာလဲ သက်သေပြမှု၊ တနိုင်ငံလုံး ငလျင်ကြောင့် စိတ်ဆင်းရဲနေရတဲ့ကြား ရစရာကို မရှိအောင် ထပ်လုပ်တယ်။ ဗုံးကျဲမှုကြောင့် နေအိမ်တွေလည်း ပျက်စီးသွားတာ ရှိတယ်”ဟု ဖြစ်စဉ် သိရှိသူ ဒေသခံက ပြောသည်။
စစ်ကောင်စီသည် ထိုနေ့ နေ့လည်(၂)နာရီကျော်အချိန်တွင် ပီကင်းကောခူကျေးရွာသို့ လေကြောင်းဖြင့် ဗုံး(၂)လုံး ထပ်မံကျဲချတိုက်ခိုက်ခဲ့ပြီး နေအိမ်တွင်းရှိ အရပ်သားပြည်သူ အမျိုးသား(၄)ဦး ထပ်မံသေဆုံးခဲ့ရပြီး ဒဏ်ရာ ရရှိသူများလည်း ရှိကြောင်း သိရသည်။
“ပြည်သူတွေ သဘာ၀ဘေးအန္တရာယ်ကြောင့် ဒုက္ခရောက် နေရတဲ့အချိန်မှာ ပြည်သူတွေအပေါ်ကို ထပ်ပြီး ဗုံးကြဲတာက တော်တော် အောက်တန်းကျတဲ့လုပ်ရပ်ဖြစ်တယ်၊ တစ်နိုင်ငံလုံး အခက်အခဲဖြစ်နေရတဲ့အချိန်မှာ ကူညီကယ်ဆယ်ရေးတွေက မလုပ်ဘဲ ဗုံးနဲ့ကြဲနေတာ၊ အပစ်ရပ်တယ်လို့သာပြောတာ ရှမ်းမြောက်၊ ကချင် တွေမှာလည်း နေ့စဉ် လေကြောင်းတိုက်ခိုက်မှုနေလုပ်နေတာ၊ ဒါတွေက စစ်ကောင်စီရဲ့ ယုတ်မာမှုတွေပဲ” ဟု ကရင်နီပြည် နေထိုင်သည့် အမျိုးသားတစ်ဦးကလည်း ခမ်းသားငေါဝ်းကို ပြောသည်။
စစ်ကောင်စီသည် နိုင်ငံတစ်ဝန်း ငလျင်ဘေးသင့်နေချိန် ယာယီအပစ်ရပ်ထားမည်ဟု ကြေညားထားသော်လည်း ဧပြီလ(၂)ရက်နေ့မှ စပြီး ကရင်နီပြည်နယ်အတွင်း လေကြောင်းတိုက်ခိုက်မှုများ ဆက်တိုက် လုပ်ဆောင်လျက်ရှိကြောင်း KNDFက ဆိုသည်။
စစ်ကောင်စီသည် အရပ်သားပြည်သူများကို ပစ်မှတ်ထား၍ အရှက်အရွံ့မဲ့စွာ လေကြောင်းတိုက်ခိုက်မှု ပြုလုပ်နေခြင်းအပေါ် ၎င်းတို့၏ အပစ်ရပ်ကြေညာထားချက်အတိုင်း လိုက်နာဆောင်ရွက်ခြင်း မရှိသည်ကိုလည်း ထောက်ပြထားသည်။
မြန်မာနိုင်ငံ ငလျင်ကြီး လှုပ်ခတ်သည့် မတ်လ (၂၈)ရက်မှ စပြီး ယနေ့အချိန်ထိ စစ်ကောင်စီမှ ကရင်နီပြည်နယ်အတွင်း လေကြောင်းတိုက်ခိုက်မှုကြီး (၃)ကြိမ်တိုင်တိုင် လုပ်ဆောင်ခဲ့ပြီး လက်နက် ကြီး ပစ်ခတ်မှုအား နေ့စဉ်လုပ်ဆောင်နေကြောင်း ထုတ်ပြန်ထားသည်။
ထို့ကြောင့် ပြည်သူများနှင့် တော်လှန်ရေးအဖွဲ့အနေဖြင့် စစ်နှင့် သဘာဝဘေးဆိုင်ရာ အန္တာရာယ်များ အချိန်မရွေးကျရောက်လာနိုင်သည့်အတွက် လုံခြုံရေးအသိ သတိရှိကြရန် ကရင်နီအမျိုးသားများ ကာကွယ်ရေးတပ်-KNDFက အထူးတိုက်တွန်းထားသည်။
#PPV0011
#Humanright
#ပီကင်းကောခူ
#လေကြောင်းတိုက်ခိုက်
ခမ်းသားငေါဝ်း Telegram
https://t.me/thepeoplevoicePaO
youtube channel
www.youtube.com/@khamsarngor7295
ခမ်းသားငေါဝ်း Tittok www.tiktok.com/@khamsarngor1
ကိုလည်းဝင်ရောက်ဖတ်ရှုနိုင်ပါသည်။