လားရှိုးမြို့ကို စစ်ကောင်စီပြန်လည် အုပ်ချုပ်မည်ဟု သတင်းထွက်ပေါ်၊ ဌာနဆိုင်ရာ ပစ္စည်းများ MNDAA နေရာ ရွှေ့ပြောင်းမှု လုပ်ဆောင်နေ
………………….
ခမ်သားငေါဝ်း
ဧပြီလ ၅၊ ၂၀၂၅
https://www.facebook.com/share/p/1VSiAP6Dox/
လက်ရှိ ကိုးကန့်တပ်(MNDAA) အုပ်ချုပ်နေသည့် လားရှိုးမြို့ကို စစ်ကောင်စီက ပြန်လည်အုပ်ချုပ်မည်ဆိုသည့် သတင်းထွက်ပေါ်နေပြီး မြို့ထဲရှိ ဌာနဆိုင်ရာ ပစ္စည်းများကိုလည်း ကိုးကန့်တပ်မှ နေရာရွှေ့ပြောင်းမှု လုပ်နေကြောင်း ဧပြီလ(၅)ရက်နေ့တွင် သိရသည်။
လားရှိုးမြို့ရှိ ရပ်ကွက်အချို့ကို စစ်ကောင်စီက ဧပြီလ(၂၀)ရက်နောက်ပိုင်း ပြန်လည်အုပ်ချုပ်မည် ဟုဆိုပြီး လားရှိုးမြို့ပြင်အားလုံးကို အထူးဒေသ(၁) ထဲ ပါဝင်မည်ဖြစ်ကြောင်း သိရပြီး လက်ရှိတွင် မြို့ထဲရှိဒေသခံများ စိတ်သောက ရောက်နေကြကြောင်း ဒေသခံထံမှ သိရသည်။
“အတိအကျတော့ ကျွန်တော်တို့လည်း သေချာမသိရဘူး။ (၂၀)ရက်နေ့နောက်ပိုင်း စစ်ကောင်စီ ပြန်လည်အုပ်ချုပ်မယ် ပြောတယ်။ MNDAA ဖက်က တရားဝင် ထုတ်ပြန် ကြေညာတာတော့ မတွေ့ရသေးဘူးဆိုပေမဲ့ သတင်းကတော့ မြို့ခံအားလုံးက သိနေကြပြီ။ ကိုးကန့်တပ်တွေကလည်း ဌာနဆိုင်ရာ ပစ္စည်းတွေကို ရွှေ့ပြောင်းနေကြပြီလေ”ဟု ဒေသခံတစ်ဦးက ခမ်းသားငေါဝ်းကို ပြောသည်။
လားရှိုးမြို့ ဆေးရုံကြီးရှိ ဆေးပစ္စည်းများကိုလည်း ဧပြီလ(၃)ရက်နေ့ကစပြီး ကိုးကန့်တပ်မှ ကားဖြင့် သယ်ယူနေကြောင်း သိရသည်။
အခြားဒေသခံတစ်ဦးကလည်း “ကလေးဆေးရုံသွားပြတော့ သတင်းက(၁၈)ရက်နေ့ပိတ်မယ် ပြောတယ်။ အကယ်၍ အဲ့နောက်ပိုင်း ဆေးရုံတက်ချင်တာလိုမျိုးဆို သိန္နီမြို့ထဲ သွားပြလို့ရကြောင်း ပြောတယ်။ငါတို့ပြည်သူတွေကတော့ ကြားထဲ ဘယ်လိုလာအုံးမလဲမသိဘူး။ အသက်ရှူကြပ်တယ်။ အကြောင်းအရာ အသေးစိတ်ကို တာဝန်ရှိသူတွေက သေသေချာချာ ပြည်သူတွေအတွက် ပြောပေးစေချင်တယ်။ အခုက သေချာတာ လိုလို ဘာလိုလိုနဲ့ ဖြစ်နေတယ်”ဟု ပြောသည်။
လားရှိုးမြို့သည် MNDAA ထိန်းချုပ်ပြီးနောက် ပြန်လည်ထူထောင်ရေး အပိုင်းတွင်လည်း CDM ဝန်ထမ်းများစွာ ပါဝင်နေပြီး စစ်ကောင်စီသာ မြို့ထဲပြန်ဝင်လာ အုပ်ချုပ်မည်ဆိုလျှင် CDM ဝန်ထမ်းများအတွက်လည်း တိကျသည့် လုံခြုံမှုရရှိရန် တာဝန်ရှိသူ အနေဖြင့် ကြိုတင်ပြင်ဆင်မှု တစ်စုံ တစ်ရာ လုပ်စေလိုကြောင်း ဒေသခံက ပြောသည်။
“စစ်ကောင်စီက တာဝန်ယူမယ်ဆိုသည့်တိုင် ငါတို့က ယုံကြည်မှုမရှိဘူး။ သူတို့သာ ပြန်အုပ်ချုပ်တော့မယ်ဆိုရင် CDMဝန်ထမ်းတွေ၊ ပြီးတော့ အခြားလူငယ်တွေအတွက်က အသက်အာမခံချက် မရှိတော့ဘူး။ ဒီအတွက်လည်း တိကျတဲ့ စီစဉ်မှု တစ်ခုလုပ်စေချင်တယ်”ဟု CDM ဝန်ထမ်းနှင့်နီးစပ် သူက ပြောသည်။
တရုတ်၏ ကြားဝင်စေ့စပ်မှုဖြင့် ကိုးကန့်တပ်နှင့် စစ်ကောင်စီတို့ တရုတ်ပြည်ကူမင်းမြို့ထဲ ဒုတိယအကြိမ် ဆွေးနွေးညှိနှိုင်းမှု လုပ်သည့်အချိန်တွင် ဒေသခံပြည်သူအချို့ မြို့ထဲရှောင်နေကြခြင်း ရှိကြောင်း သိရသည်။
MNDAAသည် (၁၀၂၇)စစ်ဆင်ရေး အတွင်း ရှမ်းပြည်နယ်မြောက်ပိုင်းရှိ အရှေ့မြောက်တိုင်းစစ်ဌာချုပ်အပါအဝင် မြို့ပေါင်း(၉)မြို့ကို တိုက်ခိုက်သိမ်းပိုက် ထိန်းချုပ်ထားခြင်းဖြစ်သည်။
#PPV0011
#နိုင်ငံရေး
#လားရှိုးမြို့
#MNDAA
ခမ်းသားငေါဝ်း Telegram
https://t.me/thepeoplevoicePaO
youtube channel
www.youtube.com/@khamsarngor7295
ခမ်းသားငေါဝ်း Tittok www.tiktok.com/@khamsarngor1
ကိုလည်းဝင်ရောက်ဖတ်ရှုနိုင်ပါသည်။