စစ်ကောင်စီနှင့် PNO ပြည်သူ့စစ် တောမီးရှို့ခြင်းကြောင့် ပြည်သူနေအိမ်(၂၀)ကျော် မီးလောင်ပျက်စီး
…………………………………….
ခမ်းသားငေါဝ်း
ဧပြီ ၂၊ ၂၀၂၅
https://www.facebook.com/share/v/1553WmftfS/
စစ်ကောင်စီနှင့် PNO/PNA အသွင်ပြောင်း ပြည်သူစစ်မှ တောမီးရှို့ခြင်းကြောင့် ပြည်သူများ၏ နေအိမ်(၂၀)ကျော် မီးလောင်ပျက်စီးခဲ့ကြောင်း ဧပြီလ(၂)ရက်တွင် သိရသည်။
ပြီးခဲ့သည့် မတ်လ(၃၁)ရက်နေ့ မွန်းလွှဲပိုင်းအချိန်တွင် စစ်ကောင်စီနှင့် PNO/PNA တပ်စွဲရာနေရာ ပင်လောင်းမြို့နယ်ဆောင်းပြောင်းနှင့် နောင်ဝိုးတို့ဘက်မှ တောမီးစတင်ရှို့ခဲ့ပြီး တစ်ဆက်တစပ်တည်းရှိ သောင်မဲသင်းနှင့် လုံးပျဉ်ကျေးရွာများသို့ တောမီးကူးစက်ကာ အရပ်သားနေအိမ်(၂၀)ခန့်နှင့် လုံးပျဉ်ကျေးရွာ နေအိမ်(၄)လုံး မီးလောင်ပျက်စီး ဆုံးရှုံးခဲ့သည်။
“ရွာမှာတော့ လွန်ခဲ့တဲ့(၁)နှစ်ကျော်ကျော်လောက်က စစ်ရှောင်သွားပြီးပေါ့နော်။ မီးလောင်တာတွေကြားတော့ ကျွန်တော်တို့က ဝိုင်းဝန်းငြိမ်းသတ် ပေးလိုက်တာပဲရှိတာ။ အဲ့ထဲမှာတော့ ထိခိုက်ဆုံးရှုံးမှုတော့ တချို့တဝက်တော့ရှိတယ်။ သွားလိုက်တဲ့အချိန်မှာ အဓိကရေမရှိတာလည်းပါတယ်။ မီးတောက်လည်း တအားဆွဲနေတာ။ ဆုံးရှုံးသွားတဲ့အိမ်ကတော့ (၂၀)ကျော် (၃၀)ဝန်းကျင် လောက်တော့ရှိတယ်။ များသောအားဖြင့်တော့ ထရံအိမ်တွေဖြစ်တယ်” ဟု PNDF-KKရဲဘော်(၁)ဦးက ခမ်းသားငေါဝ်းကို ပြောသည်။
ထိုဒေသတွင် လူနေမှုမရှိသောကြောင့် ရေမရှိတော့ ရေဖြင့် မီးငြိမ်းသတ် မရသော်လည်း သစ်ရွက်၊ အဆိုတွေရှိတဲ့အရာနှင့် လိုက်ပြီး ငြိမ်းသတ်ခဲ့ရပြီး၊ မီးထပ်မကူးအောင် ပေါက်ပြားဖြင့် တူးပြီးတားခြင်းတို့ဖြင့် ဝိုင်းဝန်းတားခဲ့ကြောင်း ၎င်းက ဆက်ပြောသည်။
“(စစ်ကောင်စီ)ဗမာစစ်သားတွေက တနိုင်ငံလုံးငလျင်ဒဏ်ခံနေရလည်း သူတို့မှာစာနာမှုစိတ်မရှိဘူး ရွာမှာလူမရှိတာလည်းသိရက်နဲ့ တောမီးရှို့ရင်ရွာကိုကူးမယ်ဆိုတာ သူတို့မစဥ်းစာဘူး PNO ကိုလည်းစိတ်ကုန်တယ် ဗမာစစ်သားနဲ့ပေါင်းတော့ ဗမာစစ်သားစိတ်ဖြစ်သွားပြီ”ဟု ၄င်းကဆက်ပြောသည်၊၊
ငလျင်ဒဏ်ကြောင့် နိုင်ငံတဝန်းလုံး ဒုက္ခရောက်နေချိန် စစ်ကောင်စီနှင့် (PNO/PNA)မှ ရပ်ရွာများကို ပျက်စီးစေရန် ရည်ရွယ်ချက်ဖြင့် တောမီးရှို့ကာ ကျေးရွာအတွင်းသို့ မီးကူးစက်စေခြင်း အပါအဝင် လေကြောင်း ဗုံးကြဲတိုက်ခိုက်ခြင်း၊ အသေခံဒရုန်းဖြင့် တိုက်ခိုက်ခြင်း၊ အရပ်သားများကို ဖိနှိပ်မှုများ လုပ်ဆောင်လျက်ရှိကြောင်း ဧပြီလ(၂)ရက်မှာ (PNDF-KK)မှ ထုတ်ပြန်ထားသည်။
ထိုမီးလောင်ရာသို့ ပအိုဝ်းအမျိုးသားကာကွယ်ရေး တပ်ဖွဲ့-ခမ်းကောင် (PNDF-KK)နှင့် (KNDF) အပါအဝင် မဟာမိတ်တပ်ပေါင်းစုများက ကျေးရွာများသို့ ကူးစက်နေသော တောမီးငြိမ်းသတ်ရေး ကူညီဆောင်ရွက်ခဲ့ရကြောင်း ဖော်ပြထားသည်။
PNO/PNA သည် သောင်မဲသင်းကျေးရွာနှင့် လုံပျဉ်ကျေးရွာတို့ဘက်သို့ လက်နက်ကြီးဖြင့် လည်းကောင်း အသေခံဒရုန်းဖြင့်လည်းကောင်း နေ့စဉ်လိုလို တိုက်ပွဲဖြစ်ပွားခြင်း မရှိဘဲ ပစ်ခတ်လျက်ရှိကြောင်း ထုတ်ပြန်ချက်တွင် ဖော်ပြထားသည်။
စစ်ကောင်စီလက်အောက်ခံ PNO/PNA (အသွင်ပြောင်းဌာနေပြည်သူ့စစ်) အဖွဲ့သည် ၂၀၂၄ခုနှစ် ဇူလိူင်လခန့်ကတည်းက ဆောင်းပြောင်းကျေးရွာ၊ နောင်ဝိုးကျေးရွာ အနီးတို့တွင် တပ်စခန်းချကာ စစ်ကောင်စီတပ်နှင့် တွဲဖက်၍ ယနေ့ချိန်ထိ တပ်စွဲနေထိုင်လျက်ရှိကြောင်း ထုတ်ပြန်ချက်တွင် ဖော်ပြထားသည်။
PPV0011
ဗွီဒီယို-အွန်လိုင်း
#လူ့အခွင့်အရေး
#စစ်ရေး
#ပင်လောင်းမြို့နယ်
#ဆောင်းပြောင်း
#နောင်ဝိုးတို့
#သောင်မဲသင်း
#လုံးပျဉ်ကျေးရွာများ
#တောမီးရှို့
“မြေပြင်သတင်းများကို ခမ်းသားငေါဝ်းကဆက် လက် ရေးသားဖော်ထုတ်လျက်ရှိပါတယ်။ပြည်သူလူထုတွေအနေနဲ့ မြေပြင်သတင်းတွေ ဓာတ်ပုံ ၊ ဗီဒီယိုတွေ ပေးပို့လိုပါက ခမ်းသားငေါဝ်း page မှာလည်းကောင်း၊ ခမ်းသားငေါဝ်း signal နဲ့telegram နံပတ်ဖြစ်တဲ့ +959774725839 ကိုလည်းကောင်း လွတ်လပ်လုံခြုံစွာ သတင်းပေးပို့နိုင်ပါတယ်ခင်ဗျား။
signal – https://signal.me/#eu/b1BdB1VJ0J4DDza-uD79yC3cP7VuRGLNKT9z8_N_mdcUbrnJioZDPaAJDrB21W7