ထိုင်ဝမ်ကယ်ဆယ်ရေးဆေးအဖွဲ့ထဲမှာ မြန်မာဆရာဝန်တဦးပါဝင်တယ်ဆိုတဲ့သတင်းမှား
၂၀၂၅ခုနှစ်၊ ဧပြီလ၊ ၂ရက်။
(Fact Check) DNA/ The Red Flag
ထိုင်ဝမ်ကနေ မြန်မာပြည်ကိုလာရောက်ပြီးဆေးကုသမှုပေးမယ့် ဆရာဝန်တွေထဲမှာ မြန်မာနိုင်ငံသား ဦးနှောက်နဲ့ အာရုံကြောဆိုင်ရာ အထူးကုဆရာဝန် တဦးပါဝင်တယ်ဆိုပြီး အမျိုးသမီးတဦးရဲ့ဓါတ်ပုံသုံးပုံကို အသုံးပြုပြီး ဖြန့်ဝေထားတဲ့ သတင်းတခု လူမှုကွန်ရက်စာမျက်တွေပေါ်မှာ ပျံ့နှံ့နေပါတယ်။
အဲ့ဒီအကြောင်းအရာကို Winner Celebrity Newsကနေ မနေ့က ဧပြီလ၊ ၁ရက် နေ့လည်၁၂နာရီ ဝန်းကျင်မှာ စတင်ဖြန့်ဝေခဲ့တာရပြီ reaction ပြုလုပ်တဲ့သူလေးသောင်းကျော်အထိရောက်ခဲ့သလို၊ comment ရေးသားသူ ၃၃၅ယောက်နဲ့ ပြန်လည်မျှဝေသူ ၆၈၅အထိရှိနေတာပါ။
သတင်းမှားလင့်များ
https://archive.ph/wip/GOzxg
https://archive.ph/wip/OPIDd
ဒီအကြောင်းအရာနဲ့ပတ်သက်ပြီး MFCN အဖွဲ့ဝင်ဖြစ်တဲ့ DNA Fact Check ကနေစစ်ဆေးကြည့်တဲ့အခါမှာ အဲ့ဒီအမျိုးသမီးက “Leah Antonette Tabuyo” ဆိုတဲ့ ဖိလစ်ပိုင်နိုင်ငံသားဆရာဝန်တဦးဖြစ်တာကို တွေ့ရှိရပြီး မြန်မာနိုင်ငံသား ထိုင်ဝမ်နိုင်ငံကဆရာဝန်ဆိုတဲ့အကြောင်းအရာကမှားယွင်းနေတာပါ။
သတင်းစိစစ်ချက် ☑️
အဲ့ဒီဖြန့်ချိနေတဲ့အကြောင်းအရာမှာပါဝင်တဲ့ ဖီလစ်ပိုင်နိုင်ငံသူဆရာဝန်တယောက်ဖြစ်တယ်ဆိုတာကို Leah Antonette Tabuyoရဲ့ လူမှုကွန်ရက်စာမျက်နှာမှာ ဝင်ရောက်ကြည့်ရှုနိုင်ပါတယ်။
https://www.facebook.com/laqtabuyo/about_places
ပျံ့နှံ့နေတဲ့အကြောင်းအရာမှာပါဝင်တဲ့ ဓါတ်ပုံကိုလည်း ပြီးခဲ့တဲ့ ဇန်နဝါရီလမှာတင်ထားတာဖြစ်ပါတယ်။
https://www.instagram.com/p/DFSTjJxPwq6/?hl=en
ထိုင်ဝမ်နိုင်ငံအနေနဲ့ ငလျင်နဲ့ပတ်သက်ပြီး မြန်မာနဲ့ထိုင်း နှစ်နိုင်ငံလုံးကို အကူအညီပေးဖို့အတွက် ကမ်းလှမ်းခဲ့ပေမယ့် နှစ်နိုင်ငံလုံးက ငြင်းဆိုခဲ့တယ်ဆိုတဲ့အကြောင်းကိုလည်း People’s Spring ကသတင်းရေးသားထားပါတယ်။
People’s Spring – https://www.facebook.com/share/p/158gPyQdJQ/
သုံးသပ်ချက် ☑️
မြန်မာနိုင်ငံမှာ မြေငလျင်နဲ့ပတ်သက်ပြီး စိတ်ဝေဒနာတွေခံစားရနေချိန်မှာ သတင်းမှားဖြန့်ချိသူတွေအနေနဲ့ အကြောင်းအရာမျိုးစုံကို ပုံစံမျိုးစုံနဲ့လုပ်ကြံဖန်တီးပြီး ရေးသားဖြန့်ဝေနေကြပါတယ်။
ထိုင်ဝမ်နိုင်ငံကယ်ဆယ်ရေးအဖွဲ့ထဲမှာပါတဲ့ ဦးနှောက်နဲ့အာရုံကြောအထူးကု မြန်မာနိုင်ငံသူဆရာဝန်အမျိုးဆိုပြီး ဖီလစ်ပိုင်နိုင်ငံဆရာဝန်အမျိုးသမီးရဲ့ဓါတ်ပုံနဲ့ အကြောင်းအရာမှားတွေဖန်တီးရေးသားနေကြတာပါ။
ဒါကြောင့် ဒီကနေ့ခေတ်ဟာ ဆိုရှယ်မီဒီယာခေတ်ဖြစ်တဲ့အတွက် အဲဒီဆိုရှယ်မီဒီယာတွေပေါ်မှာ အကြောင်းအရာ တခုခုကို ပုံဖျက်ဖို့၊ ဝါဒဖြန့်ဖို့၊ ကိုယ်ကျိုးရှာဖို့ ရည်ရွယ်ပြီး သတင်းအတု၊ သတင်းအမှားတွေကို ရည်ရွယ် ချက်ရှိရှိ ဖြန့်ဝေနေကြတာကြောင့် အလွယ်တကူ မယုံကြည်ဖို့၊ ပြန်ပြီး မမျှဝေကြဖို့ အကြံပြုလိုပါတယ်။
စာဖတ်သူတွေအနေနဲ့ သတင်းတု/သတင်းမှား ဖြစ်တယ်လို့ သံသယရှိရင်ပဲဖြစ်ဖြစ်၊ မှန်ကန်တဲ့သတင်း ဟုတ်၊ မဟုတ်အတည်ပြု မေးမြန်းလိုရင်ပဲဖြစ်ဖြစ်၊ Fact Checking ပြုလုပ်ပေးတဲ့ သတင်းဌာန/အဖွဲ့ အစည်းတွေရဲ့ Chat Box ကနေ သွားရောက်မေးမြန်းကြဖို့ တိုက်တွန်းလိုပါတယ်။
Myanmar Fact-checking Network အဖွဲ့ဝင်ဖြစ်တဲ့ DNA Fact Check အဖွဲ့ကိုလည်း Facebook page ကနေဆက်သွယ်မေးမြန်းနိုင်သလို ဒီနေရာ (dnafactcheck @gmail.com)ကနေ လည်း ဆက်သွယ်မေးမြန်းပြီး အချက်အလက်စစ်ဆေးပေးဖို့ တောင်းဆိုနိုင်ပါတယ်။
Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။