ပြည်သူများ ငလျင်ဒဏ်ခံရချိန် ဆက်သွယ်ရေးလိုင်းများ ဖြတ်တောက်ထားမှု ခြွင်းချက်မရှိ ဖွင့်ပေးရန် တောင်းဆို

ပြည်သူများ ငလျင်ဒဏ်ခံရချိန် ဆက်သွယ်ရေးလိုင်းများ ဖြတ်တောက်ထားမှု ခြွင်းချက်မရှိ ဖွင့်ပေးရန် တောင်းဆို
…………………..
ခမ်းသားငေါဝ်း
ဧပြီ ၁၊ ၂၀၂၅

https://www.facebook.com/share/p/1AFJyfDWp4/

ပြည်သူများ ငလျင်ဒဏ်ခံရချိန် အင်တာနက်နှင့် ဆက်သွယ်ရေးလိုင်းများ အများပြည်သူ သတင်းအချက် အလက်များ ရပိုင်ခွင့် ကန့်သတ်ထားသည်များကို ချက်ချင်း လက်ငင်း ရုပ်သိမ်းဖယ်ရှားရန် မြန်မာနိုင်ငံ ဒီဂျစ်တယ်အခွင့်အရေး လှုပ်ရှားသော အဖွဲ့ပေါင်း (၉၀)ကျော်က မတ်လ(၃၁)ရက်တွင် လက်မှတ်ရေးထိုး တောင်းဆိုထားသည်။

မြန်မာနိုင်ငံတွင် ငလျင်လှုပ်ခတ်ပြီး အရေးပေါ်အကူညီများ အရေးတကြီးလိုအပ်ချိန်တွင် အခြေခံကျသော အင်တာနက်ဝန်ဆောင်မှု ပိတ်ဆို့ခြင်း၊ ကန့်သတ်ခြင်းကို စစ်ကောင်စီက ဆက်လက်လုပ်‌ဆောင်လျက်ရှိကြောင်း ‌သိရသည်။

ထိုသို့ အများပြည်သူ၏ အသက်အန္တာရာယ်ကို လျစ်လျူရှုကာ ဆက်သွယ်ရေး ဖြတ်တောက်မှုကို ဆက်လက်လုပ်ဆောင်မှုအပေါ် မြန်မာနိုင်ငံဒီဂျစ်တယ် အခွင့်အရေးလှုပ်ရှားသော အဖွဲ့များက အပြင်းထန်ဆုံး( အပြင်းထန်ဆုံး) ရှုတ်ချကြောင်း ထုတ်ပြန်တောင်းဆိုချက်တွင်ဖော်ပြထားသည်။

အင်တာနက်ပိတ်ဆို့ကန့်သတ်မှုများကြောင့် အများပြည်သူ အသက်ဆုံးရှုံးမှုနှင့် နစ်နာမှုများအားလုံးအတွက် စစ်ကောင်စီမှ တာဝန်ခံရန် ကြေညာချက်ဖြင့် တောင်းဆိုကြောင်း ဖော်ပြထားသည်။

ဒီဂျစ်တယ်အခွင့်အရေးအဖွဲ့မှ ပြုစုထားသော အချက်အလက်အရ မြန်မာနိုင်ငံတဝှမ်းလုံးတွင် စစ်ကောင်စီ၏ အင်တာနက်ဖြတ်တောက်မှုကို ခံနေရသော မြို့နယ်ပေါင်း(၁၀၀) ခန့်ရှိရာ လက်ရှိ ငလျင်ဒဏ် ခံနေရသော မြို့နယ်များ ပါဝင်ကြောင်း သိရသည်။

အများပြည်သူ သတင်းအချက်အလက် ရရှိနိုင်သော လူမှုကွန်ရက်စာမျက်နှာများ၊ သတင်းမီဒီယာများ၊ ဝက်ဘ်ဆိုဒ်များအား ပိတ်ပင်သော “Firewall” တပ်ဆင်ထားခြင်းအား ဖယ်ရှားထားခြင်း မရှိသေးကြောင်း သိရသည်။

လျှပ်စစ်မီးပြတ်တောက်ခြင်းနှင့် ငလျင်ကြောင့် ဆက်သွယ်ရေးကွန်ရက်အခြေခံ အဆောက်အအုံထိခိုက်မှုကြောင့် ဆက်သွယ်ရေး အခြေအနေ ပိုမိုဆိုးရွားစွာ ပြတ်တောက်မှုကို မြန်မာပြည်သူများ ကြုံတွေ့လျက်ရှိကြောင်း သိရသည်။

ထို့ကြောင့် အာဏာသိမ်းစစ်ကောင်စီကို မြန်မာနိုင်ငံ ဒီဂျစ်တယ်အခွင့်အရေးအဖွဲ့များမှ အချက်(၅)ချက်ဖြင့် တောင်းဆိုထားကြောင်း သိရသည်။

ပိတ်ထားသော ဆက်သွယ်ရေး အင်တာနက်လိုင်းကိုချက်ချင်း ခြွင်းချက်မရှိ ဖွင့်ပေးရန်နှင့် ငလျင်ဒဏ်ကြောင့် ဆက်သွယ်ရေး အဆောက်အအုံနှင့် လျှပ်စစ်မီးပေးစနစ် ပျက်စီးမှုရှိပါက ချက်ချင်း ဦးစားပေး ပြင်ဆင်ရန်။

Firewall တပ်ဆင်ထားခြင်းအပါအဝင် အင်တာနက်ကို ဆင်ဆာဖြတ်တောက်ရန်နှင့် ကန့်သတ်ရန် လုပ်ဆောင်မှုအားလုံးကို ချက်ခြင်း(ခြွင်းချက်မရှိ) ရပ်သန့်ကာ အင်တာနက်‌ နှေးကွေးမှုကို ဖြစ်စေသည့် (VPN) ခံ၍ အများပြည်သူက မဖြစ်မနေအသုံးပြုနေရခြင်းအပေါ် အင်တာနက်ပြည့်ပြည့်ဝဝရရှိရေး ချက်ခြင်း လုပ်ဆောင်ရန်။

မီဒီယာများ လွတ်လပ်စွာ သတင်းအချက်အလက် ရယူမှုအပေါ် ကန့်သတ်ထားမှုအပေါ် ချက်ခြင်း (ချက်ခြင်း) ဖယ်ရှားရန်၊ သတင်းမီဒီယာများကို ဖမ်းဆီးအရေးယူမှုနှင့် ခြိမ်းခြောက်မှုများကို လုံးဝ(လုံးဝ)လုပ်ဆောင်ခြင်း မပြုရန်။

အရေးပေါ်ကယ်ဆယ်ရေးများကို လွတ်လပ်စွာတာင်းခံနိုင်ရန် အဟန့်အတားဖြစ်စေသည့် စစ်သားစုဆောင်းမှု၊ ဖမ်းဆီးမှု၊ သတ်ဖြတ်မှု၊ ခြိမ်းခြောက်မှု၊ လေကြောင်းတိုက်ခိုက်မှုအားလုံးကို ချက်ခြင်း(ချက်ခြင်း) ခြွင်းချက်မရှိ ရပ်တန့်ရန်၊ ငလျင်ဒဏ်ခံစားနေသူများအတွက် ကူညီနေသူများနှင့် သတင်းရယူသူများကို ဖမ်းဆီး အပြစ်ပေးခြင်း မပြုရန်နှင့်

အင်တာနက်ပိတ်ဆို့မှုနှင့် သတင်းအချက်အလက်ရယူပိုင်ခွင့်အပေါ် ကန့်သတ်ခဲ့သည့် လုပ်ရပ်အပေါ် လူထုအသက်ဆုံးရှုံးမှုများနှင့် အဖက်ဖက်မှ နစ်နာခဲ့မှုများအတွက် စစ်ကောင်စီတစ်ဖွဲ့တည်းသာ အပြည့်အဝ တာဝန်ရှိသည့်အတွက် အပြည့်အဝ တာဝန်ခံရန် တောင်းဆိုထားသည်။

ထို့အပြင် နိုင်ငံတကာအစိုးရများ၊ ကုလသမဂ္ဂ (UN) အဖွဲ့အစည်းများ၊ လူသားချင်းစာနာထောက်ထားရေးဆိုင်ရာ အဖွဲ့အစည်းများ၊ အိုင်စီဒီ နည်းပညာ ကုမ္ပဏီများနှင့် နိုင်ငံတကာ အသိုင်းအဝိုင်းသို့လည်း တောင်းဆိုထားသည်။

အများပြည်သူ အကူအညီများ တောင်းခံနိုင်ရေးနှင့် ပြင်ပကမ္ဘာဖြင့် ဆက်သွယ်နိုင်ရေးအတွက် အင်တာနက် ပိတ်ဆို့ကန့်သတ်ထားမှု ဖယ်ရှားရန် စစ်ကောင်စီအား ဖိအားပေးတောင်းဆိုရန်နှင့် အရေးပေါ် အခြေအနေများတွင် ဆက်သွယ်ရေး ပြတ်တောက်ခြင်းမရှိဘဲ အရေးပေါ်ဆက်သွယ်ရေး ဆိုင်ရာ ဖြေရှင်းနည်းများကို ထိရောက်စွာ ဆောင်ရွက်ရန်တို့ကို တောင်းဆိုထားကြောင်း သိရသည်။

ဆက်သွယ်ရေး အကူအညီများ၊ အရေးပေါ်အကူအညီများကို စစ်‌ကောင်စီက အများပြည်သူကို ဖိနှိပ်ရာတွင် အသုံးချခြင်းမျိုး မဖြစ်စေရန်ဆောင်ရွက်ပေးဖို့ နိုင်ငံတကာ အသိုင်းအဝိုင်းသို့ တောင်းဆိုထားကြောင်း သိရသည်။

#PPV0011
#အင်တာနက်
#Humanright
#ဖြတ်တောက်မှု

ခမ်းသားငေါဝ်း Telegram
https://t.me/thepeoplevoicePaO

ခမ်းသားငေါဝ်း Tittok www.tiktok.com/@khamsarngor1
ကိုလည်းဝင်ရောက်ဖတ်ရှုနိုင်ပါသည်။