ငလျင်ဘေးသင့် ပြည်သူများအတွက် တတ်နိုင် သည်များ အမြန်ဆုံး ပံ့ပိုးကူညီသွားမည်ဟု ညီနောင်မဟာမိတ်(၃)ဖွဲ့ထုတ်ပြန်
…………………..
ခမ်းသားငေါဝ်း
မတ်လ ၂၉၊ ၂၀၂၅
https://www.facebook.com/share/p/16GZZRg8HN/
ငလျင်ဘေးသင့်ပြည်သူများကို လူသားချင်းစာနာထောက်ထားစွာနှင့် ပြည်ထောင်စု စိတ်ဓာတ် သွေးရင်းညီအစ်ကိုစိတ်ဓာတ်အပြည့်ဖြင့် တတ်နိုင်သည်များကို အမြန်ဆုံး ပံ့ပိုးကူညီသွားမည်ဟု ညီနောင်မဟာမိတ်(၃)ဖွဲ့မှ ထုတ်ပြန်ထားသည်။
ညီနောင်မဟာမိတ်(၃)ဖွဲ့ဖြစ်သည့် ကိုးကန့်တပ် (MNDAA)၊တအောင်းတပ် (TNLA) နှင့် အာရက္ခတပ်တော် (AA)တို့မှ မတ်လ(၂၉)ရက်မှာ ထုတ်ပြန်ထားသည်။
အင်အားရစ်ခ်ျတာစကေး (၇.၇)ရှိသော အလွန်ပြင်းထန်သော ငလျင်ကြီးကြောင့် ပြည်သူလူထု၏ အသက်အိုးအိမ်စည်းစိမ်များ၊ အဆောက်အအုံများစွာ ထိခိုက်ပျက်စီး ဆုံးရှုံးမှုများအပေါ် ညီနောင်မဟာမိတ်(၃)ဖွဲ့အနေဖြင့် ကာယကံရှင် မိသားစုများ၊ ဆွေမျိုးများနှင့်ထပ်တူ ဝမ်းနည်းရပြီး စိတ်မကောင်း ဖြစ်ရကြောင်းပြောဆိုထားသည်။
လှုပ်ခတ်ခဲ့သည့် အင်အားပြင်းငလျင်နှင့် နောက်ဆက် တွဲငလျင်များကြောင့် ထိခိုက်သေဆုံး ပျက်စီးဆုံးရှုံးမှု ပကတိမြေပြင်အချက်အလက်နှင့် မိုးလေဝသဇလဗေဒတိုင်းထွာချက်များအရ နောက်ဆက်တွဲငလျင်များ ထပ်မံဖြစ်ပေါ်လာနိုင်ဖွယ် ရှိသောကြောင့် ပြည်သူလူထုများအနေဖြင့် အထူးဂရုစိုက် သွားလာ နေထိုင်ကြရန်နှင့် သတင်းမှန်များကို နားစွင့်ထားကြရန် အကြံပြုတိုက်တွန်းထားသည်။
မတ်လ(၂၈)ရက် မွန်းလွဲပိုင်းမှာလှုပ်ခတ်သွားသော အဆိုပါ အင်အားပြင်းငလျင်ကြီးကြောင့် စစ်ကိုင်းတိုင်း၊ မန္တလေးတိုင်း၊ ရှမ်းပြည်နယ်၊ ပဲခူးတိုင်း၊ နေပြည်တော် အပါအဝင် နိုင်ငံ၏ နေရာအများအပြားတွင် ပြည်သူများ၏ အသက်အိုးအိမ် ထိခိုက်သေဆုံးပျက်စီးမှုများစွာရှိခဲ့သည်။
ထို့ပြင် ဘုရားကျောင်းကန်စေတီပုထိုးများ၊ ဗလီများအပါအဝင် သာသနိက အဆောက်အအုံများ၊ ရှေးဟောင်းယဉ်ကျေးမှုအမွေအနှစ်များ၊ စာသင် ကျောင်းများ၊ ဟိုတယ်များ၊ ကျေးလက်ဆေးပေးခန်းများ စသည့် အဆောက်အအုံမြောက်များစွာ ပျက်စီးဆုံးရှုံးခဲ့ရသည်။
မြန်မာနိုင်ငံတွင် ငလျင်ဘေးကြောင့် ထိခိုက်ပျက်စီး ဆုံးရှုံးမှု များစွာ ရှိနေပြီး လက်ရှိအချိန်ထိ ကူညီကယ်ဆယ်ရေး လုပ်ငန်းများ လိုအပ်နေကြောင်းလည်း သိရသည်။
#PPV0011
#ညီနောင်မဟာမိတ်
#သဘာဝဘေး
#ငလျင်
ခမ်းသားငေါဝ်း Telegram
https://t.me/thepeoplevoicePaO
ခမ်းသားငေါဝ်း Tittok www.tiktok.com/@khamsarngor1
ကိုလည်းဝင်ရောက်ဖတ်ရှုနိုင်ပါသည်။