ခမ်းသားငေါဝ်း
သြဂုတ် ၃၀၊ ၂၀၂၄
ဒီးမော့ဆို အနောက်ဖက်ခြမ်းရှိ စစ်ရှောင်စခန်းတစ်ခုတွင် စားနပ်ရိက္ခာပြတ်လပ်နေကြောင်းသြဂုတ် ၃၀ ရက်က စစ်ရှောင်ကူညီသူတစ်ဦးထံမှသိရသည်။
ကရင်နီ( ကယား) ပြည်နယ်၊ ဒီးမော့ဆို အနောက်ဘက်ခြမ်းရှိစစ်ရှောင်စခန်းတစ်ခုတွင် အလှူရှင် မရောက်ရှိလာတော့သဖြင့် စားနပ်ရိက္ခာ ပြတ်လပ်မှု နှင့် ကြုံတွေ့နေရသည်။
” ဇူလိုင်လကတည်းကစပြီး အလှူရှင်တွေရောက်မလာတော့ဘူးပေါ့နော်၊ သူတို့က အလှူရှင်တွေပဲအားကိုးနေကြရတာ၊ အခုတော့ ဆန်တွေပြတ်နေပြီ၊ တစ်ရက်ကို နှစ်နပ်ပဲ ချက်စားရတာတဲ့ ၊ တချို့ရက်တွေကျလည်း ဆန်ပြုတ် ပြုတ်သောက်ရတယ်”ဟု စစ်ရှောင်ကူညီနေသူတစ်ဦးကခမ်းသားငေါဝ်းကိုပြောသည်။
စစ်ဘေးရှောင် အချိန်ကြာလာသည်နှင့်အမျှ အခက်အခဲပိုများလာသည့်အပြင်၊ အလှူရှင်များလည်းနည်းပါးလာကြောင်းသိရသည်။
စစ်ဘေးရှောင်တစ်ဦးကလည်း” စစ်ရှောင်နေရတာကြာပြီလေ၊ သုံးနှစ်လောက်ရှိပြီ၊ အစပိုင်းကတော့ အလှူရှင်တွေ ပုံမှန်လာတယ်၊ အခုနောက်ပိုင်းတော့ လူတိုင်းက ကျပ်တည်းနေကြတော့ လေ၊ လာလှူတာတွေသိပ်မရှိတော့ဘူး၊ စိုက်စားစရာ မြေလည်းမရှိ၊ ဝယ်လည်းမစားနိုင် ဒုက္ခ အရမ်းရောက်ရတယ်” ဟုဆိုသည်။
စစ်ရှောင်စခန်းဖွင့်ထားသည်မှာ သုံးနှစ်ခန့်ရှိပြီဖြစ်ပြီး လူဦးရေ ၁၄၆ ဦးရှိကြောင်းသိရသည်။
ကရင်နီပြည်နယ်တွင် ယခုနှစ် ရေကြီးရေလျှံမှုများကြောင့် စပါးခင်း ဧကပေါင်း မြောက်များစွာ ပျက်စီးဆုံးရှူံးခဲ့ရပြီး လာမည့် နှစ်အတွက် စားနှပ်ရိ က္ခာပိုမို ကျပ်တည်းလာနိုင်ကြောင်းသိရသည်။
#PPV 003
#Humanright
#ဒီးမော့ဆို
#ကရင်နီ
#စစ်ရှောင်