ခမ်းသားငေါဝ်း
ဖေဖော်ဝါရီ ၂၈၊ ၂၀၂၄
မှော်ဘီစျေးနေ့တွင် မှော်ဘီကျေးရွာတောင်ဖက်ရှိ စစ်ကောင်စီနှင့် PNO ပြည်သူ့စစ် စစ်ဆေးရေးဂိတ်၌ တောင်ဖက်မှ လက်နက်တင်ဆောင်လာသည့် ကားတစ်စီး ဖမ်းမိခဲ့ကြောင်းသိရသည်။
ရှမ်းပြည်နယ်တောင်ပိုင်း၊ညောင်ရွှေမြို့နယ်၊မှော်ဘီကျေးရွာရှိ အဝိုင်းပတ်တောင်ဖက်ရှိဂိတ်တွင် လက်နက်သယ်လာသောကားတစ်စီးကို ဖေဖော်ဝါရီလ၂၆ရက်နေ့က ဖမ်းမိခဲ့ကြောင်းသိရသည်။
“ကားက canter နဲ့ပေါ့နော်။ ငှက်ပျေားသီးအပြည့်တင်ထားပြီး သူတို့စစ်ဆေးလိုက်တဲ့အချိန်ငှက်ပျေားသီးအောက်မှာ သေနတ် တွေ့တယ်။ကားပေါ်လူသုံးယောက်ပါတယ်။ အကုန်ဖမ်းသွားသိမ်းသွားတယ်။ပြီးရင် အဲနေ့က အဲဂိတ်ဖြတ်သွားလို့မရတော့ဘူး။လုံးလုံးပိတ်ထားတယ်။စျေးသွားသူလည်း အကုန်ပြန်ရတယ်။မနေ့မှပြန်ဖွင့်ပေးတာ”ဟု ဒေသခံတစ်ဦးက ခမ်းသားငေါဝ်းကိုပြောသည်။
ယင်းဂိတ်ပြန်ဖွင့်ပြီးနောက် စစ်ကောင်စီနှင့် PNO ပြည်သူ့စစ်က သွားလာနေသည့်ဒေသခံနှင့်ခရီးသွားများကို တင်းကြပ်စွာ စစ်ဆေးနေကြောင်းသိရသည်။
မှော်ဘီကျေးရွာတွင် တောင်ဖက် လွိုင်ကော်သွားလမ်း၊ အနောက်ဖက် ပင်လောင်းလမ်း၊မြှောက်ဖက်တောင်ကြီးလမ်းနှင့်အရှေ့ဖက် ဆီဆိုင်မြို့သွားလမ်း ဆုံသည့်နေးရာဖြစ်သည်။
ထိုလမ်းဆုံသည် ကုန်စည်သယ်ယူပို့ဆောင်ရာ၌ အဓိက ကျသည့်လမ်းဖြစ်သလို ကရင်နီပြည် နှင့်ရှမ်းပြည်နယ် ဝင်ထွက်၍ရသည့်လမ်းလည်းဖြစ်သည်။
မှော်ဘီကျေးရွာတွင် တောင်ဖက်ရွာအဝင်ဂိတ်နှင့် မှော်ဘီရွာအနောက်ဖက် ဘီလူးချောင်းဖြတ် တံပေါ်ရှိဂိတ်စသည့် ဂိတ်နှစ်ခုရှိပြီး ယင်းဂိတ်နှစ်ခုစလုံး တင်းကြပ်စွာ စစ်ဆေးနေ၍ ဖြတ်သန်းသွားလာသည့် ဒေသခံနှင့် ခရီးသွားများထံ ပစ္စည်း လုယူခြင်းတို့လည်း မကြာခဏကြုံရကြောင်းသိရသည်။
ပြီးခဲ့သည့် ဖေဖော်ဝါရီလ ၁၇ ရက်နေ့တွင်လည်း ဖယ်ခုံမြို့ဒေသခံတစ်ဦး သယ်လာသည့်ဒီဇယ်၊ဓာတ်ဆီ ၉ ပေပါဖမ်းဆီးထိနိးသိမ်းခံရပြီး လူကို သိန်း ၅၀ဖြင့် ပြန်လည်ရွေးယူရခဲ့ရကြောင်းသိရသည်။
#PPV005
#မှော်ဘီ
#လက်နက်တင်
#တင်းကြပ်စွာစစ်ဆေး
#ညောင်ရွေမြို့
“မြေပြင်သတင်းများကို ခမ်းသားငေါဝ်းကဆက်လက်ရေးသားဖော်ထုတ်လျက်ရှိပါတယ်။ပြည်သူလူထုတွေအနေနဲ့ မြေပြင်သတင်းတွေ ဓာတ်ပုံ ၊ ဗီဒီယို တွေ ပေးပို့လိုပါက ခမ်းသားငေါဝ်း page မှာလည်းကောင်း၊ ခမ်းသားငေါဝ်း signal နဲ့ telegram နံပတ်ဖြစ်တဲ့ +959774725839 ကိုလည်းကောင်း လွတ်လပ်လုံခြုံစွာ သတင်းပေးပို့နိုင်ပါတယ်ခင်ဗျား။