ခမ်းသားငေါဝ်း
ဇန်နဝါရီ ၂၅၊ ၂၀၂၄
ဆီဆိုင်မြို့ရှိရဲစခန်းကို ဇန်နဝါရီ ၂၄ ရက်နေ့ ညက PNLA နှင့်ပူးပေါင်း တပ်တို့ကမှ တိုက်ခိုက်သိမ်းပိုက်နိုင်ခဲ့ကြောင်း သိရသည်။
ဆီဆိုင်တောင်ဘက် ပုံးလောင်းကျေးရွာနှင့် အနီးတဝိုက်တွင်စစ်ကောင်စီ လေယာဉ်ဖြင့် ဗုံးကြဲတိုက်ခိုက်ခဲ့ပြီး ၅ နာရီကျော်အချိန်ခန့်တွင် ပအိုဝ်းအမျိုးသားလွတ်မြောက်ရေးအဖွဲ့ချုပ် PNLA နှင့် ပူးပေါင်းအဖွဲ့က ဆီဆိုင်မြို့မရဲစခန်းကို သိမ်းပိုက်နိုင်ခဲ့ကြောင်း သိရသည်။
“ဝင်လာတာတောင်မသိလိုက်ဘူး မိနစ်ပိုင်းလေးအတွင်းပဲ သိမ်းသွားတာ”ဟု ဆီဆိုင်ဒေသခံတစ်ဦးက ပြောသည်။
ဆီဆိုင်မြို့မရဲစခန်းအသိမ်းခံရပြီးနောက် စစ်ကောင်စီမှတညလုံး လေယာဥ် ဖြင့် လူနေရပ်ကွက်သို့ ဗုံးကြဲတိုက်ခိုက်မှုပြုလုပ်ခဲ့ကြောင်းသိရသည်။
“မနေ့ည တစ်ညလုံးပဲ လေယာဥ်နဲ့ဗုံးကြဲနေတာ မြကန်သာမှာလူထုကိုထိတယ်၊ နောက်အဆောက်ဦး မီးလောင်တာလည်းရှိတယ်။”ဟု ဒေသခံ တစ်ဦးက ပြောသည်။
တိုက်ပွဲ၏အသေးစိတ်ကို ခမ်းသားငေါဝ်း ကဆက်လက်စုံစမ်းနေပြီး အတည်ပြုချက်ရပါကဆက်လက်ဖော်ပြပါမည်။
ဇန်နဝါရီ ၂၄ ရက် အစောပိုင်းက ဆီဆိုင်မြို့နှင့် ၃ မိုင်အကွာ လွိုင်ကော်- ဆီဆိုင်လမ်းမပေါ် စစ်ကောင်စီ စစ်ဆေးရေးဂိတ်နှင့် စစ်ကောင်စီလက်အောက်ခံ PNOပြည်သူ့စစ်ဂိတ်ကို PNLO/PNLA၊KNDF နှင်းပူးပေါင်းတပ်တို့ကတိုက်ခိုက်ပြီး မီးရှို့ဖျက်စီးခဲ့ကြောင်းသိရသည်။