ခမ်းသားငေါဝ်း
နိုဝင်ဘာ ၆၊ ၂၀၂၃
အာဏာသိမ်းပြီးကာလအတွင်း ခရီးသွားများထက်ဝက်လျော့ကျသွားသော်လည်း၂၀၂၃ ခုနှစ် ရွာငံနှင့် ပင်းတယနယ်တွင် ခရီးသွားများတဖြည်းဖြည်း များပြားလာကြောင်း ခရီးသွားပို့ဆောင်ရေး လုပ်ငန်းလုပ်ကိုင်နေသူတစ်ဦးပြောပြချက်အရသိရသည်။
ရှမ်းတောင်ရှိ ပင်းတယနှင့် ရွာငံဒေသများတွင်ပြည်တွင်းခရီးသွားများ တဖြည်းဖြည်း များလာပြီး နိုင်ငံခြားခရီးသွားလာနေမှုက နည်းပါးနေဆဲဖြစ် ကြောင်းစုံစမ်းသိရှိရပါသည်။
ယခုဆောင်းဦးရာသီဖြစ်သည့်အတွက် ခရီးသွားများပို၍လာရောက်နိုင်ပြီး နောက်နှစ်၂၀၂၄ အထိပါပိုမိုများပြားလာရောက်နိုင်ရန်မျှော်မှန်းထားကြောင်းခရီးသွားလုပ်ငန်းလုပ်ကိုင်နေသူတစ်ဦးကယခုလိုပြောပြထားသည်။
“အခုက ဆောင်းဦးကာလလည်း ဖြစ်တော့ ခရီးသွားတဲ့သူတွေက တဖြေးဖြေးနဲ့များလာတယ်၊ ပြောဖို့တော့စောသေးတယ်ပေါ့နော် နောက်နှစ်၂၀၂၄ ခုနှစ်မှာပါပိုပြီးများလာနိုင်မယ်လို့ မျှော်မှန်းထားပါတယ် “ဟု ၄င်းကဆက်ပြောထားသည်။
ခရီးသွားလုပ်ငန်းများထက်ဝက်လျော့ကျသွားသည့်အတွက် ခရီးသွားလုပ်ငန်းကိုပါ ရိုက်ခတ်မှုရှိပြီးအခက်ခဲဖြစ်စေခဲ့ကြောင်းသိရသည်။
” အခုအချိန်တော့ နိုင်ငံရေးကမတည်ငြိမ်တော့ ရိုက်ခတ်မှုရှိတာပေါ့လေ၊ ကျနော်တို့က တောတောင်တွေကိုအဓိကထားပြီး ခရီးသွားလုပ်ငန်းလုပ်နေရတော့ ပိုဆိုးတာပေါ့လေ၊ အနီးနားတဝိုက်မှာ တစုံတရာဖြစ်ရင် ကျနော်တို့ ကိုလာရိုက်ခတ်မှုရှိတော့ ခရီးသွားနည်းသွားတာပေါ့”ဟု တည်းခိုခန်း လုပ်ငန်း လုပ်ကိုင်နေသူတစ်ဦး ခမ်းသားငေါဝ်းကိုပြောသည်။
ခရီးသွားရာသီဖြစ်သည့် အောက်တိုဘာလမှဇန်နဝါရီလအထိ ခရီးသွား လာရောက်မှုပိုများပြီး ကျန်သည့်လများတွင် ခရီးသွားဧည့်သည်နည်းပါးကြောင်း စုံစမ်းသိရှိရပါသည်။
ပင်းတယ ရွာငံမြို့နယ် တွင် သဘာဝအလှအပများ အများအပြားရှိနေပြီး နှစ်စဥ်ပြည်တွင်းခရီးသွားများ လာရောက်လည်ပတ်ကြသည်။
စစ်တပ်အာဏာသိမ်းပြီးနောက် စစ်ဆေးရေးဂိတ် တင်းကြပ်စွာ စစ်ဆေးမှုများရှိသဖြင့် ခရီးသွားလာမှုနည်းပါးလာသလို၊ အာဏာသိမ်းမှု အကျိုးဆက်ကြောင့် ပြည်ပခရီးသွားများ မရှိသလောက်နည်းပါသွားသည်။